قعدت في نفس المكان أنا وصاحبي، بشوف أحوال المباراة إيه، وبتكلم معاه في كل اللي بيحصل في الفترة دي عن النادي الأهلي، خصوصاً إن الإعلام شايف شغله الله ينور، كأنه معاه ريموت كنترول بيحول بيه الجماهير زي ما هو عايز من الشرق للغرب، مستنين اللاعبيه تنزل الملعب لتشجيهم زي كل مرة.. مكدبش عليكم أنا جالي إحباط وكنت هعيط لما ملقتش بركات في المعلب وقولت "شكراً .. جيم أووووفر"، وكنت هعيط فعلاً بقى بجد لما لقيت مراسل بيقول إن فيه احتمال لتجدد إصابة بركوتا في نفس مكان قدمه.
بدأت المباراة، وبدأنا في التشجيع والهتاف عدى الشوط الأول بستر وسلامة، واشتغلت الجماهير شغلانتها التحليلية بين الشوطين زي ما انتو عارفين طبعاً إن كل واحد بقى "مشجع ومحلل وناقد ومدرب ولاعب وحكم وحكم مساعد ورئيس مجلس إدارة ومدير كرة ومدير تعاقدات كمان".. انا بقولكم الحقيقة مع إحترامي لكل الأسامي اللي اتقالت دي، بس ده اللي بيحصل فعلاً بين الشوطين من الجماهير المصرية بشكل عام.
بدأ الناس بتوع الألتراس في إشعال الشماريخ، بصراحة مستغربتش خالص، فكل ماتش بيعملوا كده، فهي محاولة "تراجيدية – كوميدية - درامية" في نفس الوقت منهم علشان يخلوا اللاعبيه يدوا كل اللي عندهم في الملعب، اتعجبت قوي أنا وصاحبي من الشماريخ الكتيرة، لغاية اللحظة الرئيسية بعد إنطلاق الشمروخ في شكل صاروخ الذي ذهب إلى اللاعب مواندا، وساعتها بصيت لصاحبي جداً: "وقولتله شوفت.. مش قولتلك.. آدي اللي كنا بنتكلم فيه قبل الماتش يا عمنا"... طب إشمعنى المرة دي الشمروخ نزل للملعب واتوجه لأحسن الوحشين في فريق زيسكو، وليه عم الحاج اللي كان ماسك الليزر كان جايبه من الغالي أبو شعاع قوي أبو 300 جنيه، كل ده علشان تبوظ علينا الدنيا ولا إيه؟؟؟
والله يا جماعة وما ليكم عليا يمين كنت بتكلم أنا وصاحبي قبل الماتش عن المؤامرة اللي بيتعرض لها النادي الأهلي اليومين دول، وكمان كنا بنتكلم عن الحرب الإعلامية اللي بيقودها الزملكاوي المتعصب جداً، واللي دايماً بيهاجم النادي الأهلي "يالا بقى هقلد الإعلاميين الكبار اللي بيدبحوا في بعض ويقولوا على حاجات الجماهير كلها عارفاها في اللي بيهاجموه وفي الآخر يعدلوا الجرافته ويقولوا .. ولن نذكر أي أسماء" - ما علينا – أموت أنا بقى وأعرف إيه اللي مزعل الأخ اللي مش عايز أقول اسمه ده من نجوم الأهلي الكبار، زعلان منهم علشان هما السبب في ضياع بطولة الدوري من الزمالك على مر العصور مثلاً، كل اللي طلعت بيه من الموضوع إن فيه حاجة غلط متدبرة للبطل الأهلاوي، وفيه حروب من كل حته جاية راحة تخبط في الأهلي، وعلى رأي واحد اسمه "م . ف" في أهلي نيوز بيكتب باللغة العربية الفصحى ومتشدد قوي بيها، "إنها حرب إعلامية قادمة على النادي الأهلي من كل صوب وحدب"!.
المهم نرجع للماتش.. في نص الشوط الأول بدأت أسأل صاحبي هو الأهلي اتطرد منه حد؟!.. هو أنا ليه حاسس كدة إن الأهلي بيلعب ناقص، ليه في أماكن في الملعب كده فاضية أوي، وبعد دقايق بدأت استوعب السبب، بركات وتريكة مش بيلعبوا!.
الاثنين لاعبيه اللي الناس كلها بتطالبها بالإعتزال سايبين فراغ كبير في الملعب، ومع إحترامي لكل اللاعبيه بس فعلاً هما كانوا تايهين من غيرهم، همزة الوصل غايبه، وفي اللحظة اللى تيقنت فيها من الفراغ اللى بيسيبوا تريكة وكوتا اللي بيتقال عليهم عواجيز وعالة علي الفريق
وسط الماتش مكانش حد عارف بركات هيقدر يلعب ولا لأ رغم أنه موجود علي الدكة، لكن أول ما قام يسخن تنفست الجماهير الصعداء، مقدرش أوصف الإحساس اللي حسيت بيه أول ما الزئبقي نزل.. حسيت أن عدم نزوله في أول الماتش ربنا كان عايزها تبقي رسالة لكل اللى بيهاجمه.. حسيت أنه نفسه يمسك "مايك" ويقول "أنا اللاعب الذي يستطيع أن يصنع الفارق يا سادة.. فما إستفادتكم من إعتزالي" ؟!.
واللي ينقط في الموضوع كله إن الإخوة الأعداء دايما بيعلقوا شماعة تألق كوتا مع الأهلي في إن الراجل بيآخد دوا الغدة، اللي بيقولوا عنه إنه بيدي باور زيادة وكلام غريب كده، ورغم إن الدوا بيجيلوا من الفيفا نفسها، إلا إن مواقع الفريق الأبيض دايماً بتركز على صورة بركات في أي موضوع له علاقة بالمنشطات من قريب أو من بعيد، حاجة "تتتتت تخنق بجد".. سيبونا في حالنا والنبي.
أما ساحر الأهلي في الـ8 سنين اللي فاتو واللي دخل منافسة أفضل اللاعيبه المصرية اللي لعبوا كرة في مصر، أبو تريكة يواجه حرب شنعاء وكأنه لاعب مغمور، كل اللي بيهاجموا نسي مين هو أبو تريكة، اللاعب اللي أعطي لمصر قبل ما يعطي للنادي الأهلي، اللاعب اللي قدر يحقق اللي مقدرش يحققه عمالقة وعتاولة في الكرة في 20 سنة لعب.
نفسي أفهم ليه لما اللاعب بيكبر شوية ولا يبعد شوية الناس بتنسي أو "بتتناسي" إنجازاته، بس الإجابة اللي وصلتلها إن الناس لا بتنسي ولا بتتناسي، الموضوع كله إن في إلاعلاميين "محترمين" يتبعون مبدأ "هاجم تعرف" فبيهاجموا النجوم ويحاولوا يأثروا علي الجماهير لحد مينجحوا إنهم يقنعوا شوية منهم إن دا الواقع، وعشان معظم الجماهير بتتأثر بالإعلام فيبدأوا يصدقوا ويشكوا في قدرات اللاعبين، مع إنه دايماً بيحس إن في حاجة ناقصة في الملعب مع غياب الساحر!.
اللي مزعلني يا سيدي في قصة أبو تريكة دي كلها إن جوزيه الراجل البرتغالي بيطالب جماهير مصر كلها، مش جماهير الأهلي بس بأنها تحترم تاريخ اللاعب اللي أعطى كتير للمنتخب المصري، في رسالة قوية لجميع النقاد الذين يدعون بعد النظر وينسوا الحياد وعدم المجاملة للفريق اللي بينتموا له.
"قالك الصخرة يعتزل".. طيب إنتى زعلان ليه؟ .. ده "أنت غريب قوي يا غريب"، جمعه من الناس اللي فيها الخير، حتى تبص في وشه تلاقيه لاعب جد، يخوف "جاتوزو" بتاع الميلان نفسه، ياما عقّد لاعبيه من إفريقيا وأوروبا كمان، أنا مش عارف الناس اللي بتقول يعتزلوا مش لاقيين كلام يملوا بيه الجرايد، ولا حاجة يقولوها في القنوات الفضائية.. (ارفع يدي إلى السماء.. وأدعو لهم بالهداية).. قـــــطــــع "نهاية المشهد".
مشيت من "استاد الرعب" بعد الماتش والشك اللي كان جوايا إن في مؤامرة علي الأهلي مش موجود تماماً، لسبب واحد بس إنه مبقاش مجرد شك، الموضوع إتأكدلي بشكل مخيف، طبعاً هلاقي الناس بتقول نظرية المؤامرة اللي طالعة موضة في البلد اليومين واللي الشعب كله ماسكها، لكن للأسف ولأول مرة تبقي نظرية المؤامرة دي واقع بلمسه وبحسه وبعيشه فعلاً، وللأسف برضه مش عارف نهايته إيه، لكن كل اللي عارفه إن كيان الأهلي ما بيتهزش بالحاجات دي.. وبكدة نقدر نقول إن ده دايماً قدر الأبطال.
.
الرئيسية 
التسجيل 
المصحف الشريف 
